၂၀၂၄-၂၅ ဘဏ္ဍာနှစ်အတွင်းတွင် GRGI အနေနှင့် လူငယ်များ၏ အရည်အချင်းအား မြှင့်တင်ပေးရန်နှင့် လက်တွေ့လုပ်ငန်းခွင် အတွေ့အကြုံများ ရရှိစေရန်အတွက် Manufacturing၊ Marketing နှင့် Human Capital ဌာနများတွင် အလုပ်သင်စုစုပေါင်း (၁၆) ဦးကို ခေါ်ယူ လေ့ကျင့်သင်ကြားပေးခဲ့ပါသည်။ ၎င်းတို့၏ အလုပ်သင်ကာလတစ်လျှောက်တွင် အလုပ်သင်များသည် ကုန်ထုတ်လုပ်မှု လုပ်ငန်းစဉ်အသစ်များတွင် ပါဝင်ကူညီခြင်း၊ ဈေးကွက်ဖော်ဆောင်ခြင်းကမ်ပိန်းများတွင် ဝိုင်းဝန်း လုပ်ဆောင်ခြင်းနှင့် Human Capital မဟာဗျူဟာများကို ပိုမိုကောင်းမွန်အောင် ပံ့ပိုးပေးခြင်း စသည့် လုပ်ငန်းကဏ္ဍ အသီးသီးတွင် တက်ကြွစွာ ပါဝင်ခဲ့ကြပါသည်။

၎င်းတို့၏ ပါဝင်အားဖြည့်မှုများသည် ကုမ္ပဏီအတွက် သစ်လွင်သော အတွေးအခေါ်များနှင့် အမြင်သစ်များကို ရရှိစေခဲ့သည်သာမက တက်ကြွပြီး ပူးပေါင်းဆောင်ရွက်မှုရှိသော လုပ်ငန်းခွင်ပတ်ဝန်းကျင်ကို ဖန်တီးပေးနိုင်ခဲ့ပါသည်။ ယခုအလုပ်သင်ကာလ ပြီးဆုံးချိန်တွင် အလုပ်သင်များအားလုံးသည် အစီအစဉ်ကို အောင်မြင်စွာ ပြီးဆုံးခဲ့ကြပြီး ကုမ္ပဏီအတွက် ကောင်းမွန်သော အမှတ်တရနှင့် ရလဒ်ကောင်းများကို ချန်ထားရစ်နိုင်ခဲ့သလို နောင်လာမည့် အလုပ်သင်အစီအစဉ်များအတွက်လည်း လမ်းစဖောက်ပေးနိုင်ခဲ့ပါသည်။

GRGI အနေနှင့် ၎င်းတို့၏ အသက်မွေးဝမ်းကျောင်းဆိုင်ရာ တိုးတက်မှုများအတွက် ဂုဏ်ယူမိသလို အနာဂတ် ခေါင်းဆောင်ကောင်းများကို ဆက်လက် ပြုစုပျိုးထောင်ပေးသွားရန် ကတိပြုပါသည်။ ဒါ့အပြင် ယခုနှစ်တွင် ပါဝင်ခဲ့ကြသော အလုပ်သင် (၂) ဦးသည် Marketing နဲ့ Human Capital ဌာနများတွင် အမြဲတမ်းဝန်ထမ်းအဖြစ် ခန့်အပ်ခြင်းခံရပြီး လုပ်ငန်းခွင်သို့ စတင်ဝင်ရောက်နေပြီဖြစ်ကြောင်း ဝမ်းမြောက်စရာ သတင်းတစ်ခုအနေနှင့် အသိပေးအပ်ပါသည်။

“မြန်မာနိုင်ငံယမကာထုတ်လုပ်ဖြန့်ဖြူးသူများအသင်း” (MLA) ၏ ဖြစ်တည်ခြင်းကို ပိုမိုသိရှိလာစေရန်နှင့် မြို့ပြရှိ ယာဉ်မောင်းသူများအကြား တာဝန်ယူမှုရှိသော သောက်သုံးမှုအလေ့အထ (Responsible Drinking) အား မြှင့်တင်ပေးနိုင်ရန် ရည်ရွယ်၍ GRGI က “Drink Smart, Drive Safe” ဟူသော လူထုအကျိုးပြုကမ်ပိန်းကို ၂၀၂၄ ခုနှစ်၊ ဖေဖော်ဝါရီလတွင် တရားဝင်စတင်ခဲ့ပါသည်။ ဤကမ်ပိန်းအား MLA အဖွဲ့ဝင် ကုမ္ပဏီအသီးသီးနှင့် အစည်းအဝေးများ ပြုလုပ်ကာ ညှိနှိုင်းအတည်ပြုချက် ရယူပြီးနောက် စတင်အကောင်အထည်ဖော်ခဲ့ခြင်း ဖြစ်ပါသည်။ ဤကမ်ပိန်း၏ အဓိကရည်ရွယ်ချက်မှာ တာဝန်ယူမှုရှိစွာ သောက်သုံးခြင်းသည် တစ်ဦးတစ်ယောက်ချင်းစီ၏ ဆုံးဖြတ်ချက်ထက် လူမှုပတ်ဝန်းကျင်အပေါ် တာဝန်ယူမှု ရှိခြင်းဖြစ်သည် ဟူသည့် အချက်အား မီးမောင်းထိုးပြနိုင်ရန် ဖြစ်ပါသည်။ အဓိကအားဖြင့် မှန်ကန်သော ရွေးချယ်မှုများ ပြုလုပ်ခြင်းအားဖြင့် မတော်တဆမှုများကို တားဆီးနိုင်ပြီး အသက်ပေါင်းများစွာကို ကယ်တင်နိုင်မည်ကို လူထုထံ သတိပေးနှိုးဆော်နေခြင်း ဖြစ်ပါသည်။

GRGI သည် လုပ်ငန်းနယ်ပယ်တွင် ဦးဆောင်နေသော ကုမ္ပဏီဖြစ်သည့်အားလျော်စွာ MLA အတွက် ဤကမ်ပိန်းအား စတင်အကောင်အထည်ဖော်ပေးခဲ့သည့်အပြင် ကမ်ပိန်းတစ်ခုလုံးကို စနစ်တကျဖြင့် အဓိက စီမံခန့်ခွဲပေးနေခြင်းလည်း ဖြစ်ပါသည်။ ကမ်ပိန်းအကြောင်းအရာများကို မြန်မာဘာသာနှင့် ဖော်ပြပေးနေပြီး အများပြည်သူနှင့် သက်ဆိုင်သော ဗဟုသုတဖြစ်ဖွယ်ရာ အကြံပြုချက်များ၊ ဘေးကင်းလုံခြုံရေးဆိုင်ရာ သတိပေးချက်များနှင့် လူနေမှုဘဝ ဇာတ်ကြောင်းများနှင့် ထိတွေ့မှုရှိစေသည့် Real-life story ပုံစံ အကြောင်းအရာများကို အသုံးပြုပြီး လူမှုကွန်ရက်က တစ်ဆင့် Target Audience များထံသို့ ထိရောက်စွာ ချပြပေးနေပါသည်။ ဒါ့အပြင် ကမ်ပိန်း ပိုမိုကျယ်ပြန့်စေရန်အတွက် TikTok တွင်လည်း ထပ်မံတိုးချဲ့ လုပ်ဆောင်ခဲ့ပါသည်။

ကမ်ပိန်း၏ အဓိက အမှတ်အသား (Masthead) အား မြန်မာနိုင်ငံတွင် အလွယ်တကူတွေ့မြင်လေ့ရှိသော လမ်းညွှန်သတိပေး အမှတ်အသားမှ စိတ်ကူးရယူထားခြင်း ဖြစ်ပါသည်။ Masthead တွင် ကားဘရိတ်နှင့် ယမကာပုလင်းပုံစံတို့ကို တွဲဖက်ပြီး “အာမေဍိတ် (!) သင်္ကေတ” အဖြစ် သတိပေးချက်ပုံစံ ဖော်ဆောင်ထားကာ ယမကာအဝါရောင်နှင့် လမ်းသင်္ကေတ တို့ကို အသုံးပြုထားပါသည်။

အစီအစဉ်နှင့်ပတ်သက်၍ အသေးစိတ်အား Drink Smart, Drive Safe (Facebook) နှင့် Drink Smart, Drive Safe (TikTok) တို့တွင် ဝင်ရောက်လေ့လာကြည့်ရှုနိုင်ပါသည်။

GRGI ၏ အဓိက စံထားရသော မဏ္ဍိုင်ကြီး တစ်ခုဖြစ်သည့် ‘လုပ်ငန်းနှင့် ပတ်သက်ဆက်နွယ်နေသူ အားလုံးကို လေးစားသမှုနှင့် အလေးထား ဆက်ဆံခြင်း’ ဟူသောအချက်နှင့်အညီ ကုမ္ပဏီထုတ်ကုန်များ၏ အဓိက ကုန်ကြမ်းဖြစ်သော ‘ဆန်ကွဲ’ထွက်ရှိရာ ဒေသများတွင် လိုအပ်ချက်များအလိုက် လူထုအကျိုးပြု စီမံကိန်းများအား တတ်အားသရွေ့ ဆောင်ရွက်ပေးနေပါသည်။

ဧရာဝတီတိုင်းဒေသကြီး၊ ပုသိမ်မြို့နယ်၊ ဇရပ်ဆိပ်နှင့် ဂွေးတောက်ချောင်းကျေးရွာများတွင် သန့်ရှင်းသော သောက်ရေသန့်ကို အဓိက လိုအပ်နေခြင်းကြောင့် သောက်ရေသန့်ကို ဖောဖောသီသီ သောက်သုံးနိုင်အောင် ရေသန့်စက်အား ဆောက်လုပ် လှူဒါန်းပေးခဲ့ပါသည်။ မိခင်ကုမ္ပဏီဖြစ်သော Thai Beverage Public Company Limited ၏ လမ်းညွှန်ချက်နှင့်အညီ Grand Royal က သဘာဝပတ်ဝန်းကျင်းထိန်းသိမ်းရေးနှင့် ရေရှည်တည်တံ့ခိုင်မြဲရေးဆိုင်ရာ လုပ်ငန်းများကိုလည်း အလေးထား ဆောင်ရွက်နေသောကြောင့် သောက်ရေသန့်စက်ကို လျှပ်စစ်မီး အသုံးပြုစရာ မလိုဘဲ သဘာဝနေရောင်ခြည် စွမ်းအင်ဖြင့် လည်ပတ်နိုင်အောင် ဆိုလာစနစ်ကိုပါ တပ်ဆင်ပေးထားခြင်း ဖြစ်ပါသည်။

ရွာခံများအတွက် သန့်ရှင်းသည့် သောက်ရေသန့်ကို ထုတ်လုပ်ပေးသော ရေသန့်စက်သည် နေရောင်ခြည်ရရှိမှုပေါ်မူတည်ကာ တစ်ရက်လျှင် ပျမ်းမျှအားဖြင့် (၅) နာရီမှ (၆) နာရီအထိ လည်ပတ်နိုင်ပြီး ရေသန့်ထုတ်လုပ်မှုအားဖြင့် တစ်နာရီကို လီတာ (၅၀၀)ခန့် သန့်စင်ပေးနိုင်အောင် ဆောင်ရွက်ပေးထားပါသည်။ ထို့အပြင် ရေသန့်စက်မှ သန့်စင်ပြီးသည့် သောက်ရေသန့်သည် ရွာခံများအတွက် နေ့စဉ် လုံလောက်နိုင်သည့်အပြင် ရွာလမ်းမှ ဖြတ်သန်းသွားလာကြသော အများပြည်သူများ အမောပြေနိုင်ရန် အလို့ငှာ အကျိုးပြုသည့် ရေချမ်းစင် ဖြစ်ပါသည်။ ဤလှူဒါန်းမှုအားဖြင့် GRGI က အားထားရသော လူမှုအသိုင်းအဝိုင်းပေါ်တွင် အလေးအနက်ထား ဆက်ဆံတတ်မှုနှင့် သန့်ရှင်းသော သောက်သုံးရေ ရရှိနိုင်အောင် ဆောင်ရွက်ပေးခြင်းအားဖြင့် ရေရှည်တည်တံ့ခိုင်မြဲရေးအတွက် စဉ်ဆက်မပြတ် ဆောင်ရွက်နေမှုတို့ကို ထင်ဟပ်နေစေ ပါသည်။

စီမံကိန်း အောင်မြင်စွာ ပြီးမြောက်ခဲ့သော မှတ်တမ်းဗွီဒီယို ကြည့်ရန် – Video Link

ဝန်ထမ်းများ၏ သက်သာချောင်ချိရေးနှင့် လူမှုပတ်ဝန်းကျင် ဖွံ့ဖြိုးတိုးတက်ရေးကို အလေးထားသည့် GRGI ၏ ကတိကဝတ်နှင့်အညီ၊ မြန်မာ့ရိုးရာ သီတင်းကျွတ်မီးထွန်းပွဲတော် အခါသမယတွင် နှစ်စဉ်ပြုလုပ်လျက်ရှိသော သက်သာချောင်ချိရေးအစီအစဉ်ကို ပြုလုပ်ခဲ့ပါသည်။ ဤအစီအစဉ်သည် Job Grade 5 နှင့် အောက်ရှိ ဝန်ထမ်းများအပြင်၊ မြန်မာနိုင်ငံတစ်ဝန်းရှိ GRGI ၏ အရောင်းဌာနများနှင့် သိုလှောင်ရုံများ တည်ရှိရာ အနီးတစ်ဝိုက်မှ အိမ်ထောင်စုများအတွက် မရှိမဖြစ်လိုအပ်သော အထောက်အပံ့များ ပေးအပ်ကာ ထိုလူမှုအသိုက်အဝန်းများနှင့်အတူ ရှိကြောင်း ပြသ ဖော်ဆောင် ခဲ့ပါသည်။

ဤလုပ်ဆောင်ချက်သည် GRGI ၏ အဓိက စံထားရသော မဏ္ဍိုင်ကြီး တစ်ခုဖြစ်သည့် ‘လုပ်ငန်းနှင့် ပတ်သက်ဆက်နွယ်နေသူ အားလုံးကို လေးစားသမှုနှင့် အလေးထား ဆက်ဆံခြင်း’ အား ထင်ဟပ်စေရုံသာမက၊ အဓိပ္ပာယ်ရှိ‌သော အောင်ပွဲများနှင့် ပျော်ရွှင်မှုများသည် မိမိတို့ ဝန်ဆောင်မှုပေးနေရသူများကို ပြန်လည်မျှဝေပေးခြင်းကနေ စတင်ခြင်းဖြစ်သည် ဆိုသော ယုံကြည်ချက်ကို ပိုမိုခိုင်မာစေပါခဲ့သည်။

GRGI အနေနှင့် သန့်ရှင်းသော သောက်သုံးရေ စဉ်ဆက်မပြတ် ရရှိနိုင်စေရေးအတွက် ရန်ကုန်၊ ပဲခူးနှင့် ဧရာဝတီတိုင်းဒေသကြီးတို့တွင် တည်ဆောက်လှူဒါန်းပေးခဲ့သော RO သောက်ရေသန့်စက်များအား ပြုပြင်ထိန်းသိမ်းရေးနှင့် အဆင့်မြှင့်တင်ရေးလုပ်ငန်းများ ဆောင်ရွက်ပေးခဲ့ပါသည်။

ရန်ကုန်တိုင်းဒေသကြီးအတွင်းတွင် ဝါယာလက်ကျောင်းတိုက်၊ ဗိုလ်တထောင်ဘုရားနှင့် ရွှေတိဂုံဘုရားတို့ရှိ Pressure Pump Capacitor များလဲလှယ်ခြင်း၊ အထွေထွေ Servicing လုပ်ခြင်း၊ ရေဘုံဘိုင်ခေါင်းများ၊ ပိုက်လိုင်းများနှင့် လျှပ်စစ်ပိုင်းဆိုင်ရာပစ္စည်းများကို ပြုပြင်လဲလှယ်ခြင်း စသည့် ပြုပြင်ထိန်းသိမ်းရေးလုပ်ငန်းများအား အသီးသီး ဆောင်ရွက်ခဲ့ပါသည်။

ပဲခူးတိုင်းဒေသကြီး၊ ညောင်လေးပင်မြို့နယ်ရှိ စံဖဲစံပြကျေးရွာ ရေသန့်စက်တွင် ရေစစ်ထုတ်မှုအဆင့်အတန်း ကောင်းမွန်စေရန်အတွက် RO Membrane လဲလှယ်ခြင်းကို ဆောင်ရွက်ခဲ့ပြီး၊ ဧရာဝတီတိုင်းဒေသကြီး၊ ပုသိမ်မြို့နယ်ရှိ ဇရပ်ဆိပ်ကျေးရွာတွင်လည်း ရေစစ်ကန် (Water Filter Tank) အသစ်တစ်ခုကို တပ်ဆင်ပေးခဲ့ပါသည်။

ယခုလို ပြုပြင်ထိန်းသိမ်းမှုများသည် ဒေသခံအများပြည်သူအတွက် သန့်ရှင်းသော ရေပေးဝေမှု အခြေခံအဆောက်အအုံများ ရေရှည်တည်တံ့ပြီး ဘေးကင်းလုံခြုံစွာ လည်ပတ်နိုင်စေရန်အတွက် ကူညီထောက်ပံ့ပေးခြင်း ဖြစ်ပါသည်။

GRGI အနေနှင့် ဝန်ထမ်းများ၏ ကျန်းမာရေးသုခကို အစဉ်တစိုက် အလေးထားသည့်အလျောက် ဝန်ထမ်းများအတွက် နှစ်စဉ် ဆေးစစ်ခြင်း အစီအစဉ်ကို ပြုလုပ်ခဲ့ပါသည်။ ဤအစီအစဉ်သည် ကြိုတင်ကာကွယ်သော ကျန်းမာရေး စောင့်ရှောက်မှုကို မြှင့်တင်ပေးရန်၊ ကျန်းမာရေးပြဿနာများကို စောစီးစွာ သိရှိနိုင်ရန်နှင့် ကျန်းမာပျော်ရွှင်ပြီး စွမ်းဆောင်ရည်မြင့်သော ဝန်ထမ်းထု ဖြစ်ပေါ်လာစေရေးကို အားပေးရန် ရည်ရွယ်ပါသည်။ ယခုကဲ့သို့ ကျန်းမာရေး စစ်ဆေးမှုများ ပုံမှန် ပြုလုပ်ပေးခြင်းအားဖြင့် GRGI အနေနှင့် ဝန်ထမ်းများ၏ ကျန်းမာရေးကို ကာကွယ်စောင့်ရှောက်ရန် တာဝန်ယူမှုအား ထင်ဟပ်စေရုံသာမက ဝန်ထမ်းများ၏ ကောင်းကျိုးချမ်းသာကို ရေရှည်ရင်းနှီးမြှုပ်နှံခြင်းမှ တစ်ဆင့် ကုမ္ပဏီ၏ အဓိက စံထားရသော မဏ္ဍိုင်ကြီး တစ်ခုဖြစ်သည့် ‘လုပ်ငန်းနှင့် ပတ်သက်ဆက်နွယ်နေသူ အားလုံးကို လေးစားသမှုနှင့် အလေးထား ဆက်ဆံခြင်း’ ကို ထင်ဟပ်စေပါသည်။

ပြင်းအား (၇.၇) မဂ္ဂနီကျုရှိ ငလျင်ဒဏ်ကြောင့် ထိခိုက်ခံစားခဲ့ရသော အများပြည်သူအတွက် GRGI အနေနှင့် ကူညီကယ်ဆယ်ရေး လုပ်ငန်းများကို တတ်အားသရွေ့ လုပ်ဆောင်ပေးခဲ့ပါသည်။ ၂၀၂၅ ခုနှစ်၊ ဧပြီလမှ ဇွန်လအတွင်း ပျဉ်းမနား၊ လယ်ဝေး၊ တပ်ကုန်း၊ နေပြည်တော် (သပြေကုန်း)၊ စစ်ကိုင်း၊ မန္တလေး (မဟာအောင်မြေနှင့် အမရပူရ)၊ အင်းလေး၊ ရမည်းသင်းနှင့် ပျော်ဘွယ် စသည့် ပြင်းထန်စွာ ထိခိုက်ခံစားခဲ့ရသော ဧရိယာ (၉) ခုမှ အိမ်ထောင်စုပေါင်း (၂,၅၁၅) စုထံသို့ စားနပ်ရိက္ခာ၊ ဆေးဝါး၊ အရေးပေါ်အထောက်အကူပြုပစ္စည်းများနှင့် ခြင်ထောင်များ အစရှိသော မရှိမဖြစ်လိုအပ်သည့် အသုံးအဆောင်ပစ္စည်းများကို ဖြန့်ဝေလှူဒါန်းခဲ့ပါသည်။ ဤအစီအစဉ်သည် ဒေသခံများ၏ အရေးပေါ်လိုအပ်ချက်ကို ဖြည့်ဆည်းပေးရန်နှင့် ပြန်လည်ထူထောင်ရေးလုပ်ငန်းများလုပ်ဆောင်သည့် ကနဦးကာလများတွင် အထောက်အကူပြုနိုင်ရန် ရည်ရွယ် လုပ်ဆောင်ခြင်း ဖြစ်ပါသည်။

မန္တလေးတွင် ဖြစ်ပွားခဲ့သော ငလျင်ဒဏ်ကြောင့် ကုန်ပစ္စည်းများ ထိခိုက်ဆုံးရှုံးမှု ဖြစ်ပေါ်ခဲ့သည့် လုပ်ငန်းမိတ်ဖက်များထံသို့ GRGI က လိုအပ်သော အကူအညီများ ပေးအပ်ခဲ့ပါသည်။ အရောင်းဌာန အနေနှင့် လုပ်ငန်းများ ပြန်လည် လည်ပတ်နိုင်ရန်နှင့် ပြန်လည်ထူထောင်နိုင်ရန် ရည်ရွယ်ပြီး ထိခိုက်မှုရှိခဲ့သော Distributor များထံသို့ ထောက်ပံ့ရေးပစ္စည်းများ ပေးအပ်လှူဒါန်းခြင်းကို စီစဉ်ဆောင်ရွက်ခဲ့ပါသည်။ ဤဆောင်ရွက်မှုများသည် GRGI ၏ အဓိက စံထားရသော မဏ္ဍိုင်ကြီးများဖြစ်သော Creating Value၊ Collaboration နှင့် Care for Stakeholders ဟူသည့်အချက်များကို ထင်ဟပ်စေပြီး အကျပ်အတည်းကာလများတွင် မိတ်ဖက်များ၊ အများပြည်သူများနှင့်အတူ အမြဲရပ်တည်ပေးသည့် ကုမ္ပဏီ၏ ကတိကဝတ်ကို ထပ်လောင်းအတည်ပြုလိုက်ခြင်း ဖြစ်ပါသည်။

၂၀၂၅ ခုနှစ် ပထမသုံးလပတ်ကာလအတွင်း ရွှေတိဂုံစေတီတော်မြတ်ကြီးတွင် ရွှေပြားအသစ်များ အစားထိုးလဲလှယ်ခြင်း အပါအဝင် အဓိက ပြုပြင်မွမ်းမံမှုလုပ်ငန်းများကို ဆောင်ရွက်ခဲ့ပါသည်။ ဤသို့ နိုင်ငံတော်အဆင့် အမျိုးသားယဉ်ကျေးမှု အမွေအနှစ် ထိန်းသိမ်းစောင့်ရှောက်သည့် လုပ်ငန်းစဉ်တွင် GRGI ကလည်း တစ်ချပ်လျှင် ငွေကျပ် သိန်း (၁၅၀) တန်ဖိုးရှိသော ရွှေပြား (၅) ချပ် (စုစုပေါင်း တန်ဖိုးငွေကျပ် သိန်း (၇၅၀) ကို ပါဝင်လှူဒါန်းခဲ့ပါသည်။ ဤလှူဒါန်းမှုသည် ရွှေတိဂုံစေတီတော်မြတ်ကြီး ရေရှည်တည်တံ့ခိုင်မြဲစေရန် ရည်စူး၍ သဒ္ဓါကြည်လင်စွာဖြင့် ကုသိုလ်တော်အဖြစ် ပါဝင်ပူဇော်ခဲ့ခြင်း ဖြစ်ပါသည်။ GRGI အနေဖြင့် နောင်တွင်လည်း အခွင့်အရေးကြုံကြိုက်တိုင်း နိုင်ငံတော်၏ အဖိုးတန်ယဉ်ကျေးမှု အမွေအနှစ်များ ထိန်းသိမ်းစောင့်ရှောက်သည့် လုပ်ငန်းစဉ်များတွင် ကူညီသွားမည် ဖြစ်ပါသည်။